Հանրապետությունում իր տեսակով և հնարավորություններով եզակի կրիմինալիստիկական ուսումնափորձագիտական կենտրոնի նպատակն է ուսանողների պրակտիկ հմտությունների և կարողությունների զարգացումը, համալսարանի, այլ ուսումնական հաստատությունների և գիտահետազոտական կենտրոնների, գործարար և գիտական ոլորտների ազգային համագործակցության հիմքերի ստեղծումը: Կենտրոնն ընդգրկում է՝ կրիմինալիստիկական ուսումնական կաբինետ, կից մասնագիտական լոկալ գրադարանով և մատնադրոշմային, հետքաբանական, ձեռագրաբանական ֆինանսատնտեսական և դատահաշվապահական, համակարգչատեխնիկական լաբորատորիաներ: Կենտրոնի նյութատեխնիկական և լաբորատոր սարքավորումներով հագեցվածությունն ապահովում է ուսանողներին առավել արդիական գիտելիքների հաղորդումը: Կենտրոնի ստեղծմամբ զարգացման նոր աստիճան է սահմանվել «Կրիմինալիստիկա» և հարակից դասընթացների դասավանդման մեջ, ապահովվել է ուսուցման գործնական ուղղվածությունը և հաղորդվող գիտելիքների կապը պրակտիկայի հետ: «Գլաձոր» համալսարանը կենտրոնի գործունեության շրջանում համագործակցում է հանրապետության ինչպես բարձրագույն, այնպես էլ միջին մասնագիտական ուսումնական հաստատությունների հետ: Տարբեր բուհերի «Իրավագիտություն» մասնագիտության ուսումնառողները և պրոֆեսորադասախոսական կազմը ազատ են օգտվելու ուսումնական կաբինետի և լաբորատորիայի հնարավորություններից, իրականացնելու համատեղ ծրագրեր և անցկացնելու ուսումնական պրակտիկան:

Համալսարանում գործում է «Յունիդենտ» ստոմատոլոգիական կլինիկան՝ հագեցած վերջին սերնդի սարքավորումներով և նյութերով: Այն որպես ուսումնաօժանդակ կառույց է ծառայում «Ստոմատոլոգիա» մասնագիտության ուսումնառողների համար, վերջիններս տեսական գիտելիքները միաժամանակ համադրում են գործնականի հետ: Կլինիկայում աշխատում են բարձրակարգ մասնագետներ, ովքեր նաև դասավանդում են համալսարանում: Կլինիկան սպասարկում է համալասարանի ուսանողներին և դասախոսներին:

Համալսարանում «Բուժական գործ» և «Ստոմատոլոգիա» մասնագիտությունների իրականացմանը զուգահեռ բացվեցին անատոմիայի, մանրէբանության, ֆիզիոլոգիայի, կենսաքիմիայի հյուսվածաբանության լսարան-լաբորատորիաները: Վերջիններիս նպատակն է ուսումնառողների տեսական գիտելիքների գործնական կիրառումը: Լաբորատոր սարքավորումների, մուլյաժների, մանրէաբանական սարքավորումների, մանրադիտակների, ոսկրերի, կմախքների և այլ նյութերի ու սարքավորումների առկայությամբ հնարավորություն է ստեղծված լիարժեք իրականացնել տեսական և գործնական դասընթացները: Ժամանակակից սարքավորումների, լավագույն ուղեցույցերի և որակյալ նյութերի կիրառումը ուսումնառության մեջ՝ հնարավորություն է տալիս հայ և արտասահմանցի ուսանողներին դեռևս ուսումնառության տարիներին գործնականում յուրացնելու մասնագիտական գիտելիքները:

Ավելի քան 300 հոգի հյուրընկալող հանդիսությունների դահլիճը նախատեսված է գիտաժողովների, ուսանողական միջոցառումների, ավարտական հանդիսությունների համար: Համալսարանի գործունեության բոլոր տարիների ընթացքում դահլիճում իրականացվել են բազմաժանր միջոցառումներ, կազմակերպվել միջհամալսարանական գիտախաղեր, կինոդիտումներ և քննարկումներ, նշվել են Երևանի «Գլաձոր» համալսարանի հոբելյանական միջոցառումները և այլն:

Էլեկտրոնային գրադարանը և համակարգչային սրահներն ուսանողներին հնարավորություն են տալիս յուրացնել համակարգչային հմտություններ, դասավանդվող առարկաներն անհրաժեշտության դեպքում ուսումնասիրել ժամանակակից համակարգիչների, պատկերադարձիչի և մյուս լրացուցիչ սարքերի ուղեկցությամբ: Համակարգչային լսարանների մշտապես թարմացվող վերջին սերնդի համակարգիչները միացված են ներքին ցանցով, ինչը դասախոսին հնարավորություն է ընձեռում հարկ եղած դեպքում ուսանողներին անհատապես ցույց տալ, բացատրել մատուցվող նյութը:

Համալսարանն ունի ժամանակակից վարժասարքերով հագեցած մարզասրահ, որտեղ անց են կացվում աերոբիկայի և ֆիզիկական կուլտուրայի պարապմունքները, դրանք իրենց դրական ազդեցությունն են ունենում ուսանողի ընդհանուր առաջադիմության բարձրացման վրա:
Ուսանողների տրամադրության տակ է նաև վոլեյբոլի բացօթյա դաշտը: