• 2001թ. «Գլաձորը» հավատարմագրվել է ՀՀ Կրթության և գիտության նախարարության կողմից: 
• 2015 թ. «Գլաձորը» հավատարմագրվել է եվրոպական չափանիշներին և ուղենիշներին համապատասխան: 
• 2021թ. մասնակցելով ինստիտուցիոնալ հավատարմագրման գործընթացին՝ «Գլաձորը» կրկին վերահավատարմագրվել է: 

2006-2007 ուսումնական տարվանից Երևանի «Գլաձոր» համալսարանում ներդրվել է ուսումնական գործընթացի կազմակերպման և ուսումնառության արդյունքների ակադեմիական կրեդիտների միջոցով հաշվառման կրեդիտային համակարգը: Այս աշխատանքների արդյունավետ կազմակերպման համար Երևանի «Գլաձոր» համալսարանում 2007-2011թթ. գործել է «Կրթական բարեփոխումների», իսկ 2012 թ.-ից՝ «Որակի ապահովման» կենտրոնը:

Համալսարանը կադրեր է պատրաստում հետևյալ մասնագիտությունների գծով՝

• Բուժական գործ 
• Ստոմատոլոգիա
• Իրավագիտություն
• Դատական փորձաքննություն
• Միջազգային հարաբերություններ 
• Ֆինանսներ
• Կառավարում (մենեջմենթ) 
• Շուկայագիտություն (մարքեթինգ)
• Հաշվապահական հաշվառում և հարկում
• Օտար լեզուներ և գրականություն
• Լեզվաբանություն, թարգմանչական գործ
• Ինֆորմատիկա (համակարգչային գիտություն)

Համալսարանում կրթությունն իրականացվում է եռաստիճան կրթական համակարգով՝ բակալավրիատ, մագիստրատուրա, ասպիրանտուրա։

«Գլաձորն» ունի թեկնածուական և դոկտորական ատենախոսությունների թեմաներ հաստատելու և գիտական ղեկավարներ նշանակելու արտոնություն:

«Գլաձորի» շրջանավարտներն այսօր աշխատում ու բարձր պաշտոններ են զբաղեցնում ՀՀ Կառավարությունում, Ազգային ժողովում, Սահմանադրական դատարանում, Դատախազությունում, Սահմանադրական դատարանում, Արտաքին գործերի, Արդարադատության և մյուս նախարարություններում, Փաստաբանների պալատում, ֆինանսաբանկային համակարգում, առևտրային և ոչ առևտրային տարբեր կազմակերպություններում, թերթերի խմբագրություններում, հեռուստառադիոընկերություններում, դպրոցներում և այլուր: 

Համալսարանի դասախոսական կազմը համալրված է գիտության մեջ մեծ ներդրում և փորձ ունեցող դոկտորներով, պրոֆեսորներով և ոլորտում տեսական ու գործնական խորը հմտություններ ունեցող այլ մասնագետներով: Համալսարանի պրոֆեսորադասախոսական կազմը պարբերաբար համալրվում է նաև թեկնածուական թեզեր պաշտպանած գլաձորյան շրջանավարտներով:

Համալսարանի շուրջ 35 շրջանավարտ գիտությունների թեկնածու է, որոնցից 20-ը դասավանդում են «Գլաձորում»:

«Գլաձորում» զարգանում է նաև գիտական միտքը, ինչի վկայությունն են բուհի դասախոսների հրատարակած մենագրությունները, հոդվածները, գիտական նստաշրջաններում ներկայացված զեկույցների հիման վրա պատրաստված ու հրատարակված ժողովածուները և այլն:

Համալսարանի` ժամանակակից տեխնիկայով հագեցվածությունն ուսանողներին տրամադրում է ուսումնական և գիտական աշխատանքով զբաղվելու, ինչպես նաև հանգստի ու ժամանցի լայն հնարավորություն: Ուսանողներին սպասարկում են Կրիմինալիստիկական ուսումնափորձագիտական կենտրոնը, դատական նիստերի դահլիճը, իրավաբանական կլինիկան, բուժական գործին և ստոմատոլոգիային առնչվող լաբորատորիաները, սիմուլացիոն սենյակը, գրադարանը, համակարգչային սրահները, առարկայական լսարանները,  օտար լեզուների խորացված ուսումնասիրությունն ապահովող լինգաֆոնային սրահները, սպորտդահլիճը, բուֆետը, բացօթյա սրճարանը և բակը, շուրջօրյա ինտերնետը:

Համալսարանը հիմնադրման օրվանից ակտիվ համագործակցում է հայաստանյան և միջազգային մի շարք առաջատար կազմակերպությունների հետ:

Կրթության բնագավառում ունեցած ավանդի համար Երևանի «Գլաձոր» համալսարանն արժանացել է շնորհակալագրերի, պատվոգրերի, ոսկե հուշամեդալների: Այսպես, 2005 թվականին Ժնևում անցկացված «Բիզնեսում բարձր որակ» իններորդ միջազգային ֆորումում համանուն միջազգային ֆոնդի կողմից «Գլաձոր» համալսարանին շնորհվել է ոսկե մեդալ՝  «Աշխատանքային գործունեության մեջ բարձր որակի համար», ինչպես նաև՝ ֆոնդի հռչակագրին «Գլաձոր» համալսարանի անդամակցության մասին վկայագիր:

«Գլաձորը» պարգևատրվել է ՀՀ վարչապետի մեդալով, Կրթության և գիտության նախարարության ոսկե հուշամեդալներով և այլն:

Տարիների նպատակասլաց աշխատանքի ու նվիրվածության շնորհիվ «Գլաձոր» այսօր նշանակում է ինչպես համալսարան, այնպես էլ կրթահամալիր: