Երևանի «Գլաձոր» համալսարանի Իրավաբանական ֆակուլտետը ստեղծվել է 1990թ-ին: Մինչև 1993թ-ը Ֆակուլտետի կազմում գործել են` «Պետականագիտական առարկաներ»-ի ամբիոնը, որը ղեկավարել է ի.գ.թ., դոց. Հենրիկ Մկրտիչի Խաչատրյանը և «Քրեագիտական առարկաներ»-ի ամբիոնը, ի.գ.թ., դոց. Ռոբերտ Զավենի Ավագյանի ղեկավարությամբ:
Ֆակուլտետի աշխատանքներն առավել արդյունավետ և համակարգված դարձնելու նպատակով 1993թ-ին Արծրուն Գուրգենի Էդիլյանի ջանքերով և գլխավորությամբ ստեղծում է մեկ` «Ընդհանուր իրավագիտության» ամբիոն:
1998-2000թթ. ամբիոնի աշխատանքները ղեկավարել է ի.գ.թ., դոց. Գուրգեն Հայկազի Այվազյանը, իսկ 2001-2002թթ.` ի.գ.թ., դոց., Արդարադատության առաջին դասի պետական խորհրդական Միքայել Վախթանգի Գրիգորյանը:
2003թ-ից մինչ օրս ամբիոնի վարիչի պարտականությունները կատարում է ի.գ.դ., պրոֆ. Ժորա Դանիելի Ջհանգիրյանը:
Ամբիոնն իր աշխատանքները կազմակերպելիս ղեկավարվում է ՀՀ ԿԳՄՍ նախարարության, համալսարանի գիտական խորհրդի որոշումներով, ամբիոնի կանոնադրությամբ, ամբիոնի կիսամյակային աշխատանքային պլաններով և կանոնակարգող ներքին այլ փաստաթղթերով։
2006-07 ուս. տարվանից ֆակուլտետն անցում է կատարել ուսուցման եռաստիճան համակարգի՝ բակալավրիատ, մագիստրատուրա և ասպիրանտուրա:
2007 թվականից ներդրված է կրեդիտների կուտակման և փոխանցման համակարգ:
«Ընդհանուր իրավագիտության» ամբիոնը ծավալում է լայն գիտական գործունեություն: Ամբիոնի դասախոսներն ակտիվորեն մասնակցում են «Գլաձոր» համալսարանի պրոֆեսորադասախոսական կազմի և ասպիրանտների ամենամյա գիտաժողովներին: Գիտաժողովին ներկայացրած գիտական զեկույցները լույս են տեսնում համալսարանի պրոֆեսորադասախոսական կազմի և ասպիրանտների ամենամյա գիտաժողովների նյութերի ժողովածուներում:
Ամբիոնը ձեռնամուխ է եղել մի շարք դասագրքերի, մենագրությունների, ուսումնական, ուսումնամեթոդական ձեռնարկների պատրաստմանն ու հրատարակմանը:
Իրավաբանական ֆակուլտետի ուսանողները հնարավորություն ունեն ստացած տեսական գիտելիքները կիրառել պրակտիկայում` այն է կազմակերպել ու անցկացնել դատախաղեր, ձեռք բերել դատավարության կազմակերպման և անցկացման հմտություններ, իրականացնել փորձաքննություններ` այդ նպատակով ստեղծված Իրավաբանական կլինիկայում և դատափորձագիտական կենտրոնում:
Ամբիոնի նպատակներն ու խնդիրներն իրականացնելու, «Իրավագիտություն» մասնագիտության մասնագիտական կրթական ծրագրով նախանշված վերջնարդյունքների ձեռքբերումն ապահովելու և այլ նպատակներով, ամբիոնի դասախոսական համակազմը մշտապես համալրվել և համալրվում է դոկտոր-պրոֆեսորներով, թեկնածուներով և դոցենտներով: Գործնական բնույթ կրող դասընթացների դասավանդումը շարունակվում է իրականացվել ոլորտում պրակտիկ աշխատանքով զբաղված մասնագետների կողմից: Ներկայումս «Ընդհանուր իրավագիտության» ամբիոնում դասավանդում են 30 դասախոս:
Նախաավարտական ուսումնաարտադրական և գիտահետազոտական պրակտիկաներ կազմակերպելու նպատակով՝ «Գլաձոր» համալսարանի Ընդհանուր իրավագիտության ամբիոնը համագործակցում է ՀՀ Արդարադատության նախարարության, Ազգային Ժողովի, Դատախազության, Փաստաբանների պալատի, Սահմանադրական դատարանի, ՀՀ փորձագիտական կենտրոնի, Փորձաքննությունների ազգային բյուրոյի հետ:
«Ընդհանուր իրավագիտության» ամբիոնը, նախապես սահմանված ժամանակացույցին, ամբիոնի միասնական գիտահետազոտական ռազմավարությանը և թեմատիկ պլանին համապատասխան, ամիսը մեկ անգամ կազմակերպում և իրականացնում է գիտական սեմինար:
